A mostra ofrece un relato do relevante papel que desenvolveron os coros na cultura galega a través da historia de catro formacións: a ferrolá Toxos e Froles, a coruñesa Cántigas da Terra, a ourensá Coral De Ruada e a santiaguesa Cantigas e Agarimos. Na rolda de prensa detallarase o discurso expositivo desta mostra, a relevancia destes catro coros así como os denominadores comúns a todas as sociedades corais da época: o traballo etnográfico de recollida e interpretación da música e da vestimenta popular, o labor filantrópico e benéfico, as xiras e viaxes —nas que se converteron en embaixadores da cultura galega—, os inicios dunha actividade teatral galega e o seu fondo compromiso coa lingua de noso.